Galw am fusnesau i adnewyddu toiledau cyhoeddus Stryd John

Mae Cyngor Bwrdeistref Sirol Pen-y-bont ar Ogwr a Chyngor Tref Porthcawl wedi cyhoeddi cynlluniau ar gyfer adnewyddu ac atgyweirio’r cyfleusterau cyhoeddus canrif oed sydd wedi’u lleoli ar Stryd John, Porthcawl. Mae’r cyfleusterau hyn, sydd â statws rhestredig Gradd 2, yn cael eu huwchraddio’n sylweddol i wasanaethu’r gymuned yn well a chadw eu cymeriad hanesyddol.

Mae’r cyngor yn bwriadu trosglwyddo perchnogaeth y cyfleusterau hyn i Gyngor Tref Porthawl trwy Drosglwyddo Asedau Cymunedol, ar yr amod bod cynllun gwaith cynhwysfawr ac amcangyfrif o’r gost yn cael eu datblygu. Daw’r fenter hon mewn ymateb i alw cymunedol, gan bwysleisio pwysigrwydd cadw’r cyfleusterau hyn yn weithredol.

Bydd y prosiect adnewyddu yn mynd i’r afael â materion adeiledd, gan gynnwys pryderon am fandaliaeth ac ymddygiad gwrthgymdeithasol, o bosibl trwy weithredu mesurau diogelwch teledu cylch cyfyng. Bydd meysydd ffocws allweddol yn cynnwys atgyweiriadau i’r waliau allanol a’r to, yn ogystal â’r toiledau i unigolion anabl. O ystyried y statws rhestredig Gradd 2, bydd y dewis o ddeunyddiau, amseriad y prosiect, a’r gost gyffredinol—yr amcangyfrifir ei fod oddeutu £150,000—yn cael eu rheoli’n ofalus i gyd-fynd â gofynion cadwraeth.

Anogir busnesau ledled Pen-y-bont ar Ogwr i fynegi eu diddordeb gyda’r prosiect hwn, ar yr amod eu bod yn gallu bodloni’r gofynion. Bydd yr ymgynghorydd a ddewiswyd yn cael y dasg o baratoi cynllun atgyweirio ac adnewyddu manwl, ynghyd ag amcangyfrifon cost a dogfennau tendr. Bydd yr ymgynghorydd hefyd yn gweithio’n agos gyda Thîm Cadwraeth a Dylunio CBSP i sicrhau cydymffurfio â holl ofynion rhestru Gradd 2. Bydd adroddiadau cynnydd rheolaidd a datrys materion yn brydlon yn rhan o’r gwasanaethau ymgynghorol, gan sicrhau bod y prosiect yn aros ar y trywydd iawn.

Busnesau sydd â diddordeb mewn cyflwyno cynnig i wneud hynny erbyn hanner dydd ar ddydd Iau 31 Gorffennaf i swyddfeydd swyddogol Cyngor Tref Porthcawl.

Am fwy o wybodaeth am y prosiect adnewyddu, cysylltwch â info@porthcawltowncouncil.gov.uk