Llywodraeth Cymru’n lansio Strategaeth Arloesi newydd

Mae Llywodraeth Cymru wedi cyhoeddi’r strategaeth arloesi newydd ar gyfer Cymru, sy’n canolbwyntio ar ymdrechion i siapio Cymru sy’n fwy gwyrdd ac iach.

Mae’r strategaeth newydd yn nodi beth fydd Llywodraeth Cymru’n canolbwyntio arno mewn perthynas ag arloesi a helpu i roi hwb i’r economi. Mae’r pedair cenhadaeth sy’n ffurfio’r weledigaeth traws-lywodraethol hon yn cynnwys:

• Addysg: mae’r genhadaeth yn helpu i sicrhau bod gan Gymru system addysg sy’n cefnogi’r gwaith o ddatblygu sgiliau a gwybodaeth arloesi drwy gydol bywydau pobl Cymru, gan sicrhau talent, brwdfrydedd, a photensial anhygoel ein pobl ifanc a fydd, yn y dyfodol, o fudd i economi Cymru, ond a fydd hefyd yn cael effaith go iawn ar fywydau pobl.
• Economi: mae’r genhadaeth yn cynnwys ysgogi Cymru at fod yn genedl flaenllaw sy’n canolbwyntio ar arloesedd. Bydd hyn yn gweld economi Gymreig sy’n arloesi ar gyfer twf, sy’n cydweithio ar draws sectorau er mwyn canfod datrysiadau i heriau’r gymdeithas, sy’n mabwysiadu technolegau newydd ar gyfer effeithlonrwydd a chynhyrchedd, sy’n defnyddio adnoddau mewn modd cymesur, ac sy’n galluogi dinasyddion i rannu cyfoeth drwy waith teg.
• Iechyd a llesiant: Mae system iechyd a gofal Cymru’n wynebu lefelau digynsail o alw. Bydd y genhadaeth yn gweld y sector iechyd a gofal cymdeithasol yn cydweithio â diwydiant, y byd academaidd a’r trydydd sector i gyflwyno ffyrdd newydd o weithio sy’n cynnig gwell gwerth a mwy o effaith ar ddinasyddion. Bydd hyn yn golygu eu bod yn gweithio gyda’i gilydd i ddefnyddio arloesedd i drawsnewid meysydd fel oedi wrth drosglwyddo gofal, darpariaeth gofal yn y gymuned, gwasanaethau iechyd meddwl a chanser.
• Yr hinsawdd a natur: Bydd y genhadaeth hon yn cynnwys manteisio i’r eithaf ar yr adnoddau naturiol ar gyfer amddiffyn ac atgyfnerthu gwytnwch hinsawdd a natur. Byddant yn canolbwyntio ar ymdrechion arloesedd yr ecosystem mewn perthynas â mynd i’r afael â’r argyfyngau hinsawdd a natur ar y cyd, gan sicrhau trosglwyddiad cyfiawn at economi lesiant.

Gyda rhaglenni UE presennol yn dod i ben yn ddiweddarach eleni, mae’r strategaeth yn amlinellu ymrwymiad cadarn i ysgogi buddsoddiad gan lywodraeth y DU a thu hwnt, yn ogystal â gweithio gydag asiantaethau arloesi ledled y DU er mwyn cefnogi’r cenadaethau hyn.

Dysgwch fwy a darllenwch y strategaeth arloesi yn y ei chyfanrwydd.