Lansio gweledigaeth newydd gyffrous i economi Ymwelwyr Cymru yng Nghanolfan Chwaraeon Dwr Rest Bay

Ym mis Ionawr, datgelodd Prif Weinidog Cymru a’r Dirprwy Weinidog dros Dwristiaeth yr Arglwydd Elis-Thomas ddyfodol cyffrous i’r economi ymwelwyr yng Nghymru yng Nghanolfan Chwaraeon Dŵr Rest Bay a agorodd yn ddiweddar.

Mae Llywodraeth Cymru wedi cyhoeddi cynllun pum mlynedd i dyfu’r economi ymwelwyr, gan ganolbwyntio ar gryfderau Cymru, ei thirweddau, diwylliant a lleoedd. Bydd y cynllun, sy’n dwyn yr enw Croeso i Gymru: Blaenoriaethau ar gyfer yr Economi Ymwelwyr 2020-25, yn cael ei ariannu gan ddwy gronfa i gefnogi’r diwydiant.

Cronfa fuddsoddi yw’r Gronfa Busnesau Micro a Bychan (MSBF) sy’n targedu prosiectau buddsoddi cyfalaf cymwys yn y sector twristiaeth yng Nghymru. Gellir ei defnyddio i naill ai diweddaru cynnyrch presennol neu greu cynnyrch newydd o ansawdd uchel.

Yn cael ei chefnogi gan Gymunedau Gwledig Llywodraeth Cymru – Rhaglen Datblygu Gwledig 2014-2020 a ariennir gan Gronfa Amaethyddol Ewrop ar gyfer Datblygu Gwledig (CAEDG) a Llywodraeth Cymru, mae MSBF ar gael i fusnesau micro a bach gyda llai na 50 o weithwyr cyfwerth ag llawn amser.

Bydd cymorth o rhwng £25,000 a £500,000 yn cael ei ystyried er mwyn:

• Creu a diogelu swyddi

• Gwireddu budd economaidd a thwf

• Cyflwyno ansawdd, arloesi a naws am le

Mae Llywodraeth Cymru, mewn partneriaeth â Banc Datblygu Cymru, wedi lansio cronfa gwerth £50 miliwn, sef Cronfa Buddsoddi mewn Twristiaeth Cymru (WTIF) sy’n dod ag arian masnachol a chyllid grant at ei gilydd mewn un pecyn cyfunol o gymorth ariannol i ddarparu buddsoddiad cyfalaf ar gyfer y sector.

Amcan allweddol y gronfa fydd helpu i ariannu buddsoddiad cyfalaf mewn prosiectau twristiaeth sydd â chyfle i greu argraff gadarnhaol ar y sector a datblygu economi Cymru.

Beth fydd y gronfa’n ei ariannu?

• Bydd yn darparu cyfalaf i fusnesau twristiaeth, rhwng £100,000 a £5,000,000 i brosiectau cymwys

• Mae’r cyfnod ad-dalu rhwng 10 a 15 mlynedd, a gall gynnwys ysbeidiau talu tymhorol

• Bydd yn golygu mwy o hyblygrwydd o ran ariannu

• Bydd yr arian ar gael o’r adeg y bydd prosiect yn dechrau ac fe’i telir fesul cyfran drwy’r cyfnod datblygu

• Bydd taliadau benthyciad masnachol a grant cymwys yn cael eu cyfuno er mwyn lleihau cost y cyllid drwyddi draw

Am ragor o wybodaeth, ewch i wefan Busnes Cymru.